家陣無論係搭車、買早餐、買報紙雜誌，甚至連返屋企出入閘口，都係拎張八達通卡嘟一嘟就搞掂，好方便？不過個人認為有時呢啲方便，會搞出大頭佛。
好多朋友都知我係個大頭蝦，要數最容易唔記得帶出街嘅嘢，就肯定係八達通卡！因為平日都揸車，唔使搭車嘟嚟嘟去。問題就嚟喇，話說家陣有好多室內停車場都轉咗用八達通繳付泊車費，有啲管理公司會畀你入閘嗰陣先㩒車票，然後出車嗰陣先嘟八達通。但有啲就索性要你用埋張八達通入閘，如果有帶Visa都仲可以入到閘，咁啱兩樣都無的話，咁就唔該你倒車出番去，搵過第二個停車場泊啦！其實點解呢啲停車場管理公司唔造福吓人群，喺入閘機嗰度可以畀人㩒車票，又或者畀八達通負面額嘅車主入咗閘先，方便吓大家呢？
記者：丹尼斯