相信每個好似我咁鍾意行街買嘢嘅人，都會至少有兩、三張信用卡傍身，好多時仲會用埋信用卡做自動轉賬交電費、電話費，賺吓積分；買相機、電話呢類幾千蚊嘅嘢就更加會做分期付款，感覺上啲錢好似使得冇咁多！
不過老友Connie近排就因為唔見咗張信用卡，令佢對分期付款同自動轉賬產生恐懼症。佢話一直用開恒生信用卡做自動轉賬交保險同分期付款，貪佢簽賬有現金回贈。但唔見咗張卡之後，佢打去失卡中心報失以為一了百了，點知近日就收到做分期同自動轉賬嘅商戶，寄信畀佢話佢冇還錢！打去問銀行，先知道佢哋係唔會幫客戶通知商戶暫停過數，搞到佢𠵱家要同逐個商戶聯絡解釋，同安排還錢事宜。
恒生銀行公關Michelle解釋，由於客人同商戶嘅交易同銀行無關，所以係唔會處理因為客人失卡而要暫停自動轉賬或分期付款嘅事，但失卡中心職員會提醒客人所有自動轉賬、繳費聆同八達通等交易，要親自同商戶處理。各位姊妹要記住啦！
逢周一至周四刊出