鍾意玩賽車Game嘅機迷有兩種：一係想追求高速刺激嘅快感，二係來自戰車操控嘅真實程度！而《GT5P》必屬後者。日前最新網上免費Update推出，改名《GT5PSpecII》，正牌F1戰車F2007首度登陸，再非空談概念。想試揸？暫時提供日版更新，買咗港版嘅機迷，不妨等多陣喇！
新．戰車
火紅F2007索價兩億
Update完，當你打開Showroom一睇：「嘩，乜今集多咗架法拉利F2007咁爆嘅？」冇錯，可惜睇得未玩得，皆因遊戲已Lock死呢款戰神級賽車，再睇吓畫面右下角標住個價「Cr.200,000,000」，「Cr」係根據每場比賽名次所得嘅獎金。你會問：「點先儲夠大嗱嗱兩億Cr.呀？」不妨計一計，每場比賽冠軍最多Cr.3,250,000，即係最少要贏出61場比賽先夠錢買；再者，想得到F2007，你仲須要奪得ABCS四個級別共40場比賽嘅冠軍，達到如此境界，相信你得到F2007都冇乜用。但如果有Friend已經Unlock咗，記得恭喜佢喎！
追加2PBattle好流暢
講完野馬都係時候介紹其他新環節，《SpecII》叫人鬆一口氣係佢終於加入「2PBattle」模式！其實同以往RacingGame一樣，採用上下分割畫面進行，玩家可選擇以同一款車作賽，但比賽時原有嘅第二主觀視點（內櫳）會被踢走，目的好簡單，只係希望雙打畫面變得再精簡啫！至於比賽時流暢度同單打冇分別，唔覺出現Delay亦冇跳格問題，若果有Friend嚟探你都可以招呼人嘛！
加新賽道S彎例炒
另外，《SpecII》仲加入一條全新賽道「HighSpeedRing」，試玩發現與一般正式賽道毫無分別，操作起嚟更加容易玩，就連沙地、暗彎，甚至需要你突然煞車減速嘅「盲點」都唔係經常發生，可以咁講：初哥都舞得掂。不過，想喺橋後嘅S彎成功高速入彎就一啲都唔易，今集特別加強甩尾元素，如果你揀上一架扭力強勁嘅尾轆車（FR），再練得一身甩尾技術嘅話，想成功都唔係好難啫！
車迷Say：注意微調比例！
今次搵咗《蘋果》車版同事嚟試玩，佢建議，對某啲高級Event賽，由於大多限制「設定分數」，車輛可能要作出調校，如馬力、車重、波箱齒輪比等，若部車太勁，就要降低數值先可參賽。但就馬力、車重兩項決定性數值上，佢建議偏向減馬力優先，事關車太重不但阻礙加速，連煞車、轉彎都有極大影響，令新手玩家更易打滑失控，兩者約莫以2:1比例調低便可，即係降兩格馬力才加一格車重。當然，每架車有唔同特色，點Set車真係要慢慢試。
PROFILE
機種：PS3
類型：賽車
語言：日文
震掣：支援（可雙打）
售價：免費升級