方大同前晚舉行個唱尾場，請來剛剛再度榮升「老竇」的周國賢擔任嘉賓，周國賢更即場對方大同催婚，方大同聞言亦不甘示弱反問周國賢何時再做老竇？兩人又大搞爛gag，笑爆全場！
前晚方大同在starhall舉行演唱會的最後一場，陳奕迅（Eason）、王菀之、林海峰和彭羚夫婦捧場看騷，而當晚擔任嘉賓的是剛剛再度榮升父親的周國賢（Endy）及謝安琪（Kay），Kay的老公張繼聰則在台下捧場。
刻意着白色
Endy以一身白馬王子look出現，方大同見Endy即說：「大家要恭喜佢，佢多咗個千金！」Endy聞言即笑言：「係呀，我生咗個女，幾時到你呀?」方大同回答：「有排啦，咁你幾時生第三個啫？」Endy表示：「唔好講呢啲，今日咁多人，我戥你開心，我專登着白色嚟襯你，你係咪知我着白色所以着黑色？呢個唔係gag，但都爛咗！」觀眾聞言即大笑。
方大同和Endy同台表現甚high，雙雙跳起之餘，Endy又雙膝跪地，兩人又一同跳舞，但舞姿卻甚為「騎呢」！當晚方大同不時飲水，他笑說：「唔知有冇歌手唱唱吓去廁所呢？」另一嘉賓Kay則和方大同扮偶遇，接着合唱一曲《MyHeartWillGoOn》。
唱得比較放
事後方大同接受訪問時說：「我覺得今晚表現好啲，氣氛都好啲，我唱得比較放，而前一晚就緊張。」記者笑問他在台上飲很多水，會否「人有三急」？方大同表示不是飲很多，所以無需要去廁所。對於Eason來捧場，方大同表示：「佢之前已經話嚟睇我個騷，但成日都夾唔到時間，今次終於夾到，我已經作咗首歌畀佢。」
採訪：胡比
攝影：陳俊強