張國榮御用髮型師Herman一直深受哥哥愛戴，二人相識是一種緣份，原來哥哥是Herman入行後第一個明星客人，他的成名，說來哥哥也有功勞。
Herman早前接受哥哥好友蘇施黃主持的商台節目《是他也是你和我》訪問，他憶述：「哥哥以前好鍾意喺麗晶（現為香港洲際酒店）嘅coffeeshop飲嘢，我做嗰間髮型屋就喺隔籬，嗰陣時我仲係juniorstylist，有日佢飲完嘢，我記得佢好似係要去《勁歌金曲》唱《風繼續吹》，佢就入嚟搵我幫佢吹吓個頭，但當時我有客唔得閒幫佢，有個女仔又好鍾意佢，咁咪叫嗰個女仔同佢吹囉，點知個女仔手震得好犀利，最後都係由我吹番，之後第二日，佢話要拍戲，叫我幫佢剪頭髮，我哋就係咁開始。」自此，Herman成為哥哥的御用髮型師，也慢慢成為城中著名的星級髮型師。
「做嘢好認真」
Herman坦言眾多明星客人中，算哥哥最難服侍，他說：「因為佢做嘢真係好認真，嗰次佢做導演兼主角，梅艷芳係女主角，佢話要有五十年代感覺，阿梅個頭要紮個髻，但係阿梅啲頭髮短到不得了，但係哥哥唔理，只會同你講得未呀？你仲有45分鐘，佢就係咁，一定要你做到，最後又真係做到，人係要俾人迫先會做到好嘢。」
撰文：胡比