踏入第二季，大市走勢如何？主持同嘉賓都認為冇信心嘅股民可以趁大市反彈出貨，想買貨又毋須急於入市。沈大師話，近期唔少期指好友入市，睇好大市嘅人居多，但後市應該好大機會先回一回。
沈：沈振盈 孫：孫柏文 玲：楊慧玲
沈：股民𠵱家追貨意欲弱，有幾個訊號可以留意，第一係成交，過去兩個幾禮拜，通常跌市成交就少，升市成交就大，呢個係利好訊號；第二就係個市挨近50天平均線有一個技術阻力，上個禮拜升咗二千幾點，累積咁大升幅，今個禮拜做吓調整都唔係意外。睇埋期指，未平倉合約只係接近十萬五千張，我估計呢個禮拜都反反覆覆，之後我自己就覺得睇好機會大啲。
孫：你睇今次反彈可以去到幾多點呢﹖
沈：熊市嘅反彈浪通常係跌幅嘅一半，個市喺31000樓上跌落去20000邊，跌幅11000，反彈番5500點，可以26000點作參考，保守可睇25000點。
入中石化博反彈
關公：我建議喺6.6蚊買入中石化（386），呢隻似乎之前跌多咗！
沈：中石化呢類做下游業務嘅公司，煉油業務虧損都幾大吓，問題係國家肯補貼幾多，如果跌穿5.9蚊就要走人。
玲：如果投資一間靠阿媽補貼嘅公司，不如聽李嘉誠講搵一間盈利能力強兼市盈率低嘅公司投資好過，好似中石油（857）咁。
孫：超人話仲要有派息喎。
《大埔關公建議建議》
買入價：6.6元
目標價：8.5元
止蝕價：5.9元
時期：一個月