好多人食米唔知米貴，近日白米價錢狂升，市民去超市搶購，有舖頭甚至想囤積吊高嚟賣，先令大家驚覺原來白米咁矜貴。好彩香港背靠祖國，喺老撾訪問嘅總理溫家寶知道香港有人搶米，即刻話內地好有米，庫存量有成5,000萬噸，中央確保香港人人有飯開，市民可以放心。
大家要知道，國內仲有好多同胞未得溫飽，溫總卻率先保證港人有飽飯食，呢一番心意，八方聽到，只可以用激動嚟形容心情，就算齋食白飯冇餸挾，都要扒多兩啖飯食飽佢，否則點對得住溫總？可惜溫總有所不知，香港人越嚟越唔嗅米氣，一來纖體成風，人人聞carbohydrate碳水化合物就耍手擰頭；二來雜糧選擇多，食粉麵都好頂肚，以前出街食飯，一個人嗌兩個「靚仔」好平常，𠵱家兩個人share一碗分分鐘有剩，所以內地呢列「白米直通車」hold住慢慢開通都未遲。
愛國由一碗飯開始
「白米直通車」唔急於開行另一原因，係香港人嘴刁，只鍾意食泰國米。米行老行尊同八方講，香港入口白米八、九成係泰國米，內地進口大約佔半成。佢指大陸米係平過泰國米，不過香港人嫌粗糙唔夠飯味，所以唔係市場主流，「如果香港人啱食（大陸米），我哋一早就入口啦。」
香港人素來以腌尖聲悶識飲識食而自豪，好多年前盧David個水晶米廣告係經典寫照，不過今時唔同往日，香港人食粥食飯都係睇阿爺面色，若然腌尖大少仲嫌三嫌四，唔好話冇飽飯食，隨時米都冇得乞，更唔好講食餸飲湯，所以八方呼籲大家盡快改變飲食習慣，即日起轉食大陸米，擔心食唔慣，可以泰國米同大陸米兩溝一齊煮，循序漸進等胃口逐漸回歸祖國口味，想食大茶飯，係要付出啲代價㗎嘞。
香港人出名能屈能伸適應力強，既然喺建華八年已告別大魚大肉、飯來張口嘅日子，何妨粗茶淡飯啃埋大陸米？我哋飲嘅係東江水，食嘅係大陸米，愛國由一碗飯開始，「白米直通車」開行，「港股直通車」還會遠嗎？八方相信，香港人搶購大陸米之日，就係阿爺放心推行全民普選之時。
mailto:[email protected]