小賭王何猷龍喺澳門嘅新賭場「新濠天地」第一期工程如期完工，噚日喺地盤搞咗個平頂儀式，沿途安排咗十幾個人肉路牌，以免班貴賓搵唔到地盤入口。心情靚絕嘅何猷龍，帶埋老婆羅秀茵到場，兩公婆仲恩愛到當眾咀嘴。
何猷龍話，項目搞咗三年幾，見到就快有成果，真係好開心，至於嚟捧場嘅何太，每當見到老公上台講嘢，又或者答問題，佢都拍晒手，十足十小粉絲。當何猷龍落番台下，亦總係第一時間搵番老婆先，好似分開一陣都心掛掛嘅糖黐豆。
台下有太座撐場，台上嘅小賭王答問題亦零舍精靈，當被問到以「高回佣」搶客，搞到業界冇啖好食時，佢即時大大聲問「邊個業界？邊個業界？」問番你轉頭呢招，又畀佢成功耍甩咗個問題！