近排逢親聽到人講Accumulator（累積認購期權合約），無不搖頭嘆息，事關遇着連續幾個月跌市，銀行嘅「Ikillyoulater」計數埋單行動正式展開，問10個買家，10個都話自己輸，有啲仲輸過億。
但點都有例外嘅，好似港交所（388）主席夏佳理咁，佢話自己主攻滙控（005），接咗貨之後見價好即刻放，所以仲有得賺。夏主席話，所買嘅Accumulator接貨價唔算太高，而滙控又幾穩陣，先至唔使輸咋！
商務trip多到唔記得
咁唔使俾人killhimlater，夏主席呢排忙乜呢？除咗忙住行政會議工作、搞醫療融資諮詢，未來兩個月佢會不停咁去商務trip，仲係多到自己要去邊都唔係好記得嗰隻，大致上係先去北京，跟住到印度、以色列、天津、蒙古、意大利……恍如一隻冇腳雀仔。咦，咁咪理唔到港交所事務囉？No啦，夏主席話，呢堆trip大多數都係同港交所有關。
當問到近期兩個熱門話題：先A後H會唔會令好多國企唔可以南下？三通會唔會好似首富所講，hurt到香港經濟？
夏主席話唔使擔心，事關先A後H唔會last一段好長時間，而三通最多只會造成一小陣痛……雖然佢冇詳加解釋，但就肯定唔會俾人話唱淡香港經濟，貴為港交所主席，當然識點講嘢啦，吓嘩。
電郵：mailto:[email protected]