中國旺旺（151）上市後股價表現未能同名字一樣，但其實佢嚟香港上市背後，有一個「可歌可泣」嘅動人故事。為咗嚟香港上巿，喺過去10個月，旺旺主席蔡衍明總共賠咗差唔多300架波子！華華噚日睇到台灣《商業周刊》一篇有關蔡衍明嘅訪問，裏面提到，投資銀行賓架用激將法，令到蔡衍明將原本喺新加坡上市嘅旺旺，轉嚟香港上巿。
同銀團影相好得戚
話說，高盛同瑞銀一直游說蔡衍明將旺旺轉嚟香港上巿，但因為佢怕麻煩而冇轉到。點知有一次佢哋同蔡衍明講，康師傅（322）一喺香港掛牌，巿值就即刻係旺旺嘅兩倍！就係呢個唔輸得嘅心態，令蔡衍明憤然轉嚟香港上巿。
不過嚟香港上巿前，要喺新加坡除牌先，於是佢向12間銀團高層借8.5億美金搞私有化。蔡衍明話，呢一筆錢淨係計利息，每一日等於賠咗一部波子。
就係成功籌旗，簽文件嗰日，佢當時同銀團班賓架講，話壓力好大，點知對方回佢一句，話佢哋借咁多錢出嚟壓力仲大，因為如果佢有咩冬瓜豆腐，銀團借畀佢嘅錢就化為烏有！聽到班賓架咁講，蔡衍明即時鬆毛鬆翼，喺同班賓架影相留念時，特登𠵱到棚牙大一大咁影！
性格爽朗嘅蔡衍明喺訪問中仲話，雖然喺大陸做咗十幾年生意，但最鍾意食嘅，始終係台灣特有嘅滷肉飯，佢話：「誰比我吃得多？」咦，華華仲以為佢食得最多嘅係旺旺㖭！