黃麗梅主持嘅旅遊同飲食節目，收視一向有保證，令佢一直穩守亞視金牌主持之位。亞視前晚播映嘅《第三屆飲食天王頒獎禮》，請咗江美儀同梁思浩做頒獎嘉賓，江美儀喺台上指亞視搞飲食節目好有自己風格，但之後竟然揶揄某飲食主持好鍾意講「雞有雞味，魚有魚味」，江美儀仲話：「唔通雞有魚味？」咁啱黃麗梅主持飲食節目，都好鍾意講類似嘅說話。馮仁昭聽講江美儀嘅爛gag辣㷫咗黃麗梅，黃麗梅已向亞視高層反映不滿。
指對號入座
馮仁昭噚日打電話畀黃麗梅，問佢對江美儀寸佢有乜嘢睇法？佢話：「我主持嘅節目一向好有口碑，佢咁講我嬲到不得了，第二個或隔籬台講反而冇咁嬲，自己電視台嘅節目，點解要踩番自己人？冇理由要滅自己士氣。」同亞視冇晒合約嘅江美儀噚日喺電話度話：「我哋當日冇講稿，自己度呢段嘢都係想搞吓氣氛，大家唔好咁敏感，冇話要針對任何人，但如果人哋對號入座，我都控制唔到。」