電腦J打電話搵左丁山去聽音樂會，四月五日晚上到香港大會堂音樂廳聽中大合唱團。電腦J話中文大學學生合唱團在一九七二年十二月初試啼聲，今年紀念成立三十五周年，辦一個二○○八年音樂會，面對公眾，門票只收五十元、七十元、九十元三種。電腦J唔識唱歌，但認識好多合唱團嘅校友，佢話過去中大崇基音樂系名人如曾葉發、陳永華等都做過指揮，現在有咗全職音樂總監兼指揮，就係二○○三年畢業嘅朱振威，指揮中大合唱團到過澳門演唱馬勒第八交響曲。於四月五日之演出，中大合唱團將以十種語言合唱十四個國家不同精品，電腦J話一定精彩，買埋飛請左丁山去欣賞。
可惜吖，左丁山向秘書仄約會時間表，咁啱四月五日晚有約，唔推得，因為左丁山之英文老師今年第一季回港，在中文大學做訪問教授一個學期，四月尾就返美國咯，佢兩個禮拜前約定喺四月五日回請食飯，唔去唔得。當年老師返回美國之後，轉攻神學與語言學，後來索性唔再教語言（佢識講英文母語、普通話、廣東話、台山話），專攻宗教，退休前做過大學副校長與宗教系教授。今次到中大開科，教「福音與基督教精神」，與「基督教精神在中國」，左丁山完全唔識，但佢當年教曉左丁山講英語、寫英文，則一生難忘，點都唔可以推佢約會嘅。
電腦J略為失望，話會努力周圍搵中大校友去聽，其實中大合唱團雖以中大音樂系學生為主，但三十幾年來不少其他學系校友，例如中文系嘅嚴力耕（前鳳凰衞視新聞主播），都係中大合唱團團友，理應有好多人去捧場嘅，包括公眾人士在內。
肥仔K以前讀中學時曾參加合唱團，但一到中四就退團，現在唔記得點唱歌咯。肥仔K在東京酒吧飲多兩杯就吐心聲，話好後悔當年學鋼琴不成，學小提琴不成，學合唱不成，出外留學八年後，與不少國際學生碰頭，聚會，每遇到巴西學生彈結他，菲律賓學生唱歌，荷蘭學生彈琴，埃塞俄比亞學生唱民族歌曲，而佢就乜都唔識表演，感到好落寞，後悔少年時不學好小提琴，佢話：「大家表演之時，女同學都唔肯行埋我度！」參加過中大合唱團嘅校友，一定無此感覺。