方大同前晚舉行演唱會，表演不同樂器，博得全場掌聲。方大同爸爸更為愛兒助陣打鼓，緋聞女友薛凱琪也擔任表演嘉賓，事後還不避嫌給方大同130分，讚他讚到出面！
方大同一連兩場的「方大同未來演唱會」前晚在StarHall開鑼，鄭融、黃偉文、蘇永康和女伴、at17、林子萱、郭啓華、周栢豪和袁彩雲等均往捧場，劉德華和Twins則送上鮮花。
方爸爸助陣打鼓
方大同整晚換了兩套歌衫，其中他穿西裝時，觀眾大讚他靚仔有型，他聞言即笑說「多謝」，至安哥時則換上T恤。方大同在台上甚少說話，但盡騷音樂才華，分別表演彈鋼琴、結他和打鼓，方大同爸爸更為他擔任鼓手，唱快歌時，方大同又表演米高積遜（MichaelJackson）拿手的moonwalk。
及後方大同與緋聞女友薛凱琪（Fiona）合唱《四人遊》和《SomethingStupid》，但兩人卻沒拖手合唱，Fiona在台上說：「我同公司同事成日笑佢，平時啲人情緒起伏好大，但佢起伏只由0到0.1，憤怒同興奮都好快過，唯一一次去到0.9係做碟。方大同作歌散播愛心，好正面，帶愛畀我哋，好幸福。」事後Fiona接受訪問時大讚方大同：「我畀130分佢，100分係表現，30分係佢努力，唔拖手係想着重唱歌度，如果唔係就落喺隻手度。」方大同對此笑說：「朋友客氣鬆手啲，我畀自己80分，因為聲帶發炎未好番晒。唔拖手係啱，唔拖都冇嘢。」
農夫嘲攣直難辨
農夫也是表演嘉賓之一，大唱rap歌，其中有歌詞謂：「懷疑佢攣定直，好多人想佢做老公。」事後農夫解釋：「我哋係笑佢個頭，佢100%係正常男人，有魅力又靚仔，我係女仔一定揀佢。」
採訪：李珮洳
攝影：陳偉權
