極惡迴音 火爆演繹

極惡迴音 火爆演繹

豐田Echo一推出,到今日改埋名叫Yaris,依然咁受Fans歡迎。可能因為細細部的骰可愛,兼且改裝潛力高啩!不過仍有唔少Fans鍾情上代Echo,而且仲落力大改,就好似今日呢部加裝獨一無二BodyKit、再襯SSR15吋跑車合金胎軨同Bride桶椅嘅Echo咁,花二萬零蚊即變成極惡「迴音」王!

記者:鄭達基 
攝影:王文忠 
模特兒:Carey 
鳴謝:Spec-R(23628007)

車身狂執跑料

唔少人為座駕改裝嗰陣,都會先由外觀方面入手,呢部Echo嘅車主亦唔例外,不過佢為咗要嚟得與別不同,所以特別搵改裝公司Spec-R幫佢Design一套香港獨有嘅StyleBodyKit。呢套StyleBodyKit除包含咗加有整流裝置嘅頭尾泵把、車身兩側裙腳同大尾翼之外,仲特別換咗個加有超大生風入口嘅碳纖頭冚,襯埋特有鬼面罩,望落好似成部Turbo車咁,正宗唔打得都嚇得吓人!

子彈側鏡

15吋胎軨

巨型尾翼

■頭泵把加咗整流器,亦加大咗生風入口。

■兩側襯埋裙腳,令部車望落同地面好接近。

聲威力猛

極惡Echo內櫳同機械配搭嘅改動唔係太多,車主只係喺車廂入面,將前座換成BrideEuroII跑車桶椅,同埋喺車廂四周加裝碳纖裝飾,務求令人有如置身於跑車嘅同時,喺彎路高速疾走嗰陣,亦坐得既定又舒服。
至於機械配搭方面,車主為令引擎輸出更穩定同反應更快,更特別為佢作出大幅度嘅重修,希望藉住改善入風同點火等方法,令佢聲威力猛,絕對孭得起「極惡迴音」嘅外號,而且跑得嘈得之餘,耗油量亦唔會大幅度飆升。

■加設放大器可有效提升點火效率,但入氣及排壓要得宜,否則造成不必要秏油。

■前座換咗Bride桶椅,又襯又實用。

■中控台都加碳纖,夠醒神。

■尾泵把加咗擾流設計,尾喉亦換成跑車專用款式。

■車廂改動集中喺碳纖裝飾。

改Echo要注意入風量

Spec-R揸Fit人阿Wing提大家喺改Echo嗰陣,記得要幫部車「先搞健康,後搞改裝」,因Echo本身已有一定車齡,若強將改裝部品加喺車上,而事前無幫部車做任何檢查,尤其係點火同電子系統,隨時只會得物無所用。喺改裝嗰陣可着重喺點火方面,你大可加設放大器去改善點火問題。另外入風流量亦切記唔可以太大,排壓亦要做得好好,以免動力雖然有所增加,但耗油量亦因而暴升。

惡相大改 ToyotaEcho
改裝餐單

項目 價錢
1.Spec-R特鑄StyleBodyKit $15,000
(包括碳纖頭冚、頭泵把、尾泵把、兩側裙腳、尾翼、車底擾流、沙板眉及Ganador子彈鏡)

2.SSRProfessorSP1 $800/一條15吋跑車合金胎軨

3.BrideEuroII跑車桶椅 $4,000/一對

4.碳纖車廂裝飾 $1,000

合計:$23,200(連安裝)