港交所（388）今個月24號舉行股東周年大會，有股壇長毛之稱嘅DavidWebb，今年提名咗彭家樂（BobBunker）做新一屆獨立非執董，噚日Webb喺網站大鑼大鼓拉票。Bob現任BentleyReid&Co（Pacific）董事，今年62歲，好了解香港金融業。據華華搵返嚟嘅資料，佢06年5月獲委任為上市委員會成員，係亞洲證券分析家協會前副主席，亦係英國商會商業政策組成員，仲係香港投資分析員公會前主席，同香港證券專業學會始創董事，畢業於劍橋大學。
今次同彭家樂一齊角逐嘅仲有現任宏高集團董事總經理郭志標（Bill），同東泰證券太子爺李君豪。對於另外兩位「參選人」，Webb嘅睇法截然不同。Webb話，佢同Bill雖然喺某啲事上好似進一步調整買賣差價方面，意見分歧，不過，Bill會將自己嘅遠見帶入金融市場。相反，李君豪就似乎唔係咁負責任。
明知有事唔出聲
阿Webb話，海域清盤前三日，李生就以私人理由辭任海域，但身為海域核數委員會主席嘅李君豪，冇理由唔知海域有事啩，而佢又冇喺當時提出呢個問題，所以阿Webb擺明唔會投佢一票！