恒豐金業（870）老闆林世榮，果真牙齒當「金」使，佢之前講過，如果金價每盎斯升穿1000蚊美金，就會「考慮」賣緊啲黃金擺設！3月中，金價走勢凌厲，升到每盎斯1002.7美金，林世榮把握時機，賣咗兩噸黃金。
噚日恒豐金公佈，繼今年1月賣咗一噸黃金，套現2億後，上個月再出售約兩噸黃金擺設，套現約5億銀。不過，公告冇提到賣咗嘅係乜嘢擺設，華華向公關查詢，回應係暫時乜都無可奉告，淨係話筆錢係用嚟發展內地嘅零售網絡。
賣金袋5億銀
今年1月，當恒豐金公佈賣咗一噸黃金擺設時，恒豐金行政總裁伍綺媚曾經話，賣嘅係啲金枱金凳，而且係將批展品熔咗變成金條先賣出市場。當時華華曾經問過，會唔會連金觀音，同大哨朗拿度參觀過嘅金廁所都賣，當時伍綺媚點都冇正面回應賣唔賣，只係話就算賣都有排未到佢哋。
雖然恒豐金大把黃金展品，但係伍小姐之前話，恒豐金未來會逐步減持手頭黃金展品，每年大概減持一噸，總共會減持兩至三噸，主要係金擺設。心水清計吓數，1月賣咗一噸，上個月又賣兩噸，夾埋就係三噸，即係預計數目已經達標。不過，市場一致都睇好金價仲會升，林世榮冇理由有金唔賣，若然金枱金凳賣到七七八八，睇怕就算排喺隊尾嘅金廁所同金觀音都難逃被賣。
不過，林世榮都曾經將架金馬車賣咗，然後租番，睇怕林生望住祥和嘅金觀音，都唔會當金枱金凳熔咗佢啩！
恒豐金近年賣出黃金
貨品：黃金擺設 售出資料：約兩噸，熔成金條出售，售約5億銀
售出日期：08年3月 備註：-
貨品：黃金擺設 售出資料：約一噸，熔成金條出售，套現2億銀
售出日期：08年1月 備註：-
貨品：金馬車 售出資料：7500萬元售出，獲利2650萬
售出日期：07年3月 備註：每月40.62萬租回，為期三年
貨品：黃大仙像 售出資料：5834萬元售出，賺3300萬元
售出日期：06年3月 備註：每月34萬租回，為期三年
電郵：mailto:[email protected]