汪琳於上周五與拍拖五年、從事廣告宣傳的男友JoeyCheung結婚，汪琳昨日接受電話訪問時，坦言仍未習慣被稱呼「張太」，她的心情仍處於混亂狀態，好像剛剛拍完一齣劇集一樣。不過她透露註冊當天多次因感動而泣不成聲，老公仔更即場唱了一首《ForeverLove》給她，冧得她大讚老公的歌藝值102分。
汪琳與圈外男友JoeyCheung於上周五結婚，並在港麗酒店擺喜酒，筵開38席，邀請了黃囗瑩任伴娘，佘詩曼、宋芝齡和林淑敏等都有畀面出席。剛榮升張太的汪琳昨日接受電話訪問時，坦言現時心情仍十分混亂，就好像剛拍完一齣劇一樣。
「感覺似收工」
汪琳笑說：「感覺好似收工咁，𠵱家出到街就係人都恭喜我，好多人都戥我哋開心，有朋友玩我叫我做張太，自己聽到都呆咗，仲係好唔適應。」
原本計劃到希臘度蜜月的汪琳，上月尾才發現護照已過期，惟有押後蜜月計劃，待領取新護照便立即起程。至於會否趁機製造愛情結晶品，她說：「唔會住，不過佢勁鍾意小朋友，佢仲話要生夠一打，我就要睇佢表現啦，等佢錫我多啲先，不過都起碼一年後先會計劃，始終有仔要趁嫩生。」
「畀佢102分」
汪琳表示註冊當日多次感動得泣不成聲，特別是宣讀誓詞時，她一度喊到讀不下去，而且老公仔更秘密苦練唱功，即場獻唱了一首王力宏的《ForeverLove》，汪琳坦言見到老公在台上雖然表現得震騰騰，但為了給她驚喜而即場表演，令她開心不已，她笑說：「咁佢又唔係圈中人，但都花咗咁多心思，仲要好情深款款望住我，所以聽完之後我都好冧，仲會畀102分佢㖭。」
採訪：葉雪
