喺全美擁有12萬名會員嘅美國演員公會同美國大型片商公會嘅合作協議，今年6月尾就到期。演員公會成員佐治古尼（GeorgeClooney）同湯漢斯（TomHanks）已經開聲話想盡快傾掂數，以免重蹈編劇公會早前大罷工嘅覆轍。但前日雙方談判似乎唔多理想，電視及電台藝人聯盟話要同原本同一陣線嘅演員公會分家，各自同片商談判。好多人都憂慮情況會惡化，但片商公會話對談判有信心。