近排樓市同股市一樣有啲𣲷，但係舊年中港樓市皆旺，睇番中港兩地發展商出嘅年報，管理層07年度嘅人工，都有唔錯升幅。據新浪財經嘅統計，大陸發展商中年薪第一高嘅唔係碧桂園（2007）楊主席兩父女，而係萬科王石。不過，大陸發展商人工點高都好，要追上香港發展商長實（001）李澤鉅、新世界發展（017）鄭家純，就仲有大段距離。
只係小超人純官零頭
鍾意行吓山、影吓相，同其他大陸發展商隔空討論吓地產樓市減價戰嘅王石，舊年總共𢭃咗691萬銀（人仔．下同），比06年度加咗64%。除咗主席加人工，總裁郁亮都加咗59%，舊年薪酬總額596萬。舊年萬科淨利潤同06年比升咗超過一倍，相對於公司業績，兩位高層嘅人工加幅都未同業績同步。
除咗較為香港人認識嘅王石之外，大陸其他發展商嘅管理層加薪幅度都幾大，好似萬通地產總經理許立舊年薪酬總額雖然只係80萬，但比06年度坐同一個職位嘅丁泰，就足足多咗一倍，丁泰06年都係總經理，但只係攞40萬啫。另外招商地產董事總經理林少斌就收207萬，該公司同一職位06年度嘅薪金總額係82.9萬，即係呢個post加咗1.49倍薪酬。
不過貴為大陸發展商人工最高嘅主席，相比起香港嘅地產發展商，就當然係小巫見大巫，長實07年度年報未出，睇住06年先，小超人李澤鉅總人工有成4217萬港銀，純官07年度嘅人工更達2.4億港銀，至於新地（016）郭氏兄弟07年𢭃嘅人工最實惠，各𢭃約200萬港銀，輸畀王石。
碧桂園及萬科老闆人工比較
楊惠妍
07年度人工：170.2萬 增幅：348%
楊國強
07年度人工：350.5萬 增幅：140%
王石
07年度人工：691.0萬 增幅：64%
電郵：mailto:[email protected]