無綫新劇《金石良緣》今晚首播，演員鍾嘉欣、陳法拉、鄭則士同曹永廉等噚日齊集奧海城宣傳，各藝員分別介紹劇中必睇情節，畀觀眾率先掌握劇情。鍾嘉欣推介一幕佢生BB嘅艱苦過程，仲即場示範生仔呼吸方法㖭，嘉欣話：「呢節係劇中最經典嘅場面，對鏡頭喊足三個鐘，拍之前仲搵護士教我呼吸法。」
鄭則士換尿片
陳法拉透露劇中會有一場同曹永廉鴛鴦戲水嘅場面，但就點到即止，唔算特別性感。噚日班藝員仲分組幫BB公仔換尿片，已為人父嘅鄭則士有板有眼，迅速完成兼勝出，之後又猜鍾嘉欣着咗高踭鞋後嘅高度以及陳法拉嘅鞋號，馬海倫即提議猜陳法拉嘅三圍數字，搞到法拉一臉尷尬，事後法拉話：「其實都冇所謂，選美時都公開過三圍數字，𠵱家都差唔多。」據知當年佢選美時嘅三圍係34、24、34。