唔經唔覺入咗大學已經半年嘅神童沈詩鈞March仔，噚日十歲牛一。沈爸爸好開心咁同八方講，個仔嘅年齡終於唔係單位數字喇！
壽星仔噚日忙於排練佢有份演出嘅舞台劇，套劇係浸大蔡元培節嘅節目之一，名為《「教」父故居風雲──百年重遇蔡元培》，今日喺大學會堂公演，詩鈞扮演童年時代嘅蔡元培。沈爸爸話，為咗連戲，導演要求詩鈞暫時唔好剪髮，搞到佢啲頭髮差啲遮住對眼，算係少少為藝術犧牲。
除咗排戲外，詩鈞班同學噚日仲專登同佢切蛋糕慶祝生日，可見佢哋雖然年齡有差距，但感情好好。至於神童有乜生日願望，沈爸爸話囝囝最希望學業成績好，咁就唔會俾爸爸媽咪鬧。