恒生個人理財及財富管理業務總經理梁永祥有女初長成，今年17歲，係應屆會考生，做老竇嘅對個女有乜期望？梁永祥話：「盡咗力就得。」話就係咁話，但實際係為咗同女兒一齊應戰，復活節放假唔外遊，佢笑笑口話：「我唔騷擾個女，已經係最大嘅幫忙嘞！」
一講到寶貝女，梁永祥就收唔到口，佢話自己讀書嗰陣，運動好耍家，乖女都有呢個優良因子，打羽毛球叻之餘，仲好靚女㖭，咁如果阿女會考之後，話唔再讀書，要做全職運動員，又或者入娛樂圈做明星，梁永祥會點睇呢？
佢話：「阿女打波係叻，亦因為咁而入到𠵱家間中學，但佢對業餘訓練都頂唔順，又點會諗全職！」
至於娛樂圈，老竇冇話唔畀，之但係佢話阿女有170cm咁高，睇怕仲有得發育，高妹喺娛樂圈好難有好發展。咁入銀行界好唔好呢呵？梁永祥話：「咁呢行真係幾好……」梁小姐，收到未？