她是盧覓雪，從她是記者妹我是設計師仔年代便建立起友誼的老友記。
她的身形沒有跟隨她天天向上的名氣看齊；反而向下調整。從前多了點babyfat，如今珠圓玉潤，配合她幾分西班牙南美面相氣質風情相得益彰。（我和李純恩在背後笑她是跳Flamingo舞女……媽媽生。）
從記者編輯大編輯到《在晴朗的一天出發》，明天四月一日開始，now無線生活台將推出由覓雪主持兼出計的新節目，各位留意啦，晚上六時三十分及十時三十分播兩次的《覓食天下》將要面世。
有咩好睇？好好好好睇；睇過試片，笑到碌地咁好睇。
以她七情上面的表情與啜核到極的智慧語錄陪襯，香港旅遊飲食節目將會邁進新紀元；一個女人又非普通閒版靚女。（雖然在下一直死死認定她是香港最佳衣着人辦，曾三次投她一票，要她當選我們時裝設計師協會舉辦之「最佳衣着人士」，結果未果，信我，終有一天！）人家飲食節目有蔡生，有韜哥，有一哥，有阿恩，有靚仔Jacky與靚靚靚仔Jacky，又有老友記阿霽有梅姐，有GiGi姐……多一個飲食節目啫，算咩？乜嘢新紀元巴閉吓？
嗱！睇啦；Michelle個《覓食天下》當然上刀山落油鑊，中台港澳兼世界各地探訪人間的味道，不同：她一個女人，不似其他男人主播例必一條或兩條甚至三條靚女陪伴在側，集集上演「飽暖思淫慾」。更是大家鹹鹹濕濕最熱中的熟老男少女「BeautyAndtheBeast」重複又重複版。
本來提議Michelle也找來幾個美少男助陣，陳冠希是首選，可惜已告別香港娛壇。當時得令當然來自美食之都巴黎兼第一電眼男郎黃長興，笑死人無數及殺死人無數的王祖藍與黃宗澤全皆No.1選擇。不過，家陣，各位觀眾：盧覓雪……及她可愛的美食以她一張幽默抵死的嘴巴食腦陪食，這美食節目絕對不是好食好好食好好好食……啊！