平時嘅灣仔金紫荊廣場，係內地同胞自由行旅客嘅熱門景點，噚日朝早，嗰處卻出現一班稀客，喺度跑嚟跑去。望真啲，原來係近百名自由黨要員，包括主席田少、副主席莎姐同立法會議員等，個個仲着住件自由黨黃色背心戰衣，唔通佢哋喺度特訓？
交咗入會表格
八方問過莎姐，佢話適逢自由黨今年成立15周年，所以特別請咗專業人士幫佢哋搞搞新意思，拍輯新嘅短片講吓自由黨未來發展，如無意外喺下個月黨慶酒會上首播。點解喺片中要跑步？莎姐話要保持神秘感，等條片出街時再同大家揭開呢個謎，總之就梗係有意思啦。
盛傳會代表自由黨喺九龍西出選嘅田二少噚日都有出現，仲排喺第一排，莫非佢已經正式成為黨員？莎姐澄清話，田二少只係交咗入會表格，仲等緊常委通過。今次叫埋佢嚟，係因為條片預計下個月先出，如無意外田二少到時都會成為正式黨員。當然，如果佢嘅申請唔過關，就唔可以喺短片出現，所以個攝影師都專登拍咗啲冇田二少嘅shot，以防有乜意外時條片都可以繼續出街喎。做電視出身嘅莎姐，果然設想周到。