明星名人愛養貓狗，昨日兩個寵物活動，傅明憲的愛犬上台屙屎，而鄺美雲的愛犬Cash就在台上撒尿，失禮人前。不過瘀事無損主人對牠們的愛，Cash不但歎足六小時海底泥spa兼修甲按摩，更獲主人送贈價值十多萬的鑽石狗鏈。
昨日在九龍公園舉行的「博愛寵物嘉年華08」，多位名人明星帶狗出席。鄺美雲單拖到場時，擔心得慌失失，原來她的愛犬Cash，被工人帶錯路口入不到場，一度以為牠走失，後來才知虛驚一場。後來鄺美雲上台領錦旗時，本來十分乖巧的Cash，居然在椅腳撒尿，認真失禮。
7月出寫真
鄺美雲說：「我啱啱同佢（Cash）焗完油先嚟，噚日先做完海底泥spa，修甲按摩，做咗六個鐘頭。」她續說：「我早排幫Cash設計咗一條粉紅金鑲鑽石，刻有Cash字樣嘅頸鍊俾佢，自己都有一條Cally字樣嘅頸鍊，不過佢嗰條鍊粗啲，貴過我四倍，要六位數字。」其間Cash經過黎小田的大狗身邊，鄺美雲即緊張得抱起牠，又話Cash熱到冇晒心機，要即刻帶牠去shopping解悶，其實Cash出名身嬌肉貴，出入有保鑣抱，更經常穿着LV、Herm囗s等名牌狗衫，今年七月仲會出寫真集。
傳明憲恨人追
另外，傅明憲、吳日言、阮小儀，陳沛嘉與男友等昨日早上在大埔出席「親親狗狗慈善步行」，傅明憲帶同四隻13歲的北京狗出席，更用BB車載住牠們，小狗上台時一度緊張屙屎，傅明憲說：「佢哋13歲，等於人90幾歲，我都習慣打理佢哋，唔使照顧反而覺得悶。」問到之前與莊氏太子爺莊家彬的緋聞，她說：「回應咗兩次，咁樣再寫冇人會追我囉！」即不抗拒有人追？她說：「唔知，總之而家冇人追。」
採訪：顏英儀、王連連
攝影：仇志德、王連連