小妹遲啲又要飛嘞，今次去美國，不過都有小小驚，因為咁大個女都係第一次去，聽啲friend講，啲美國關員檢查行李篋嗰陣，會爆爛埋行李鎖檢查。係真唔係呀？噚日同消委會啲老友傾開，原來真有其事。
老友話，美國運輸安全局（簡稱TSA），喺01年911事件發生後採取咗嚴格嘅反恐政策，對於所有進出美國境嘅行李，都會進行安全檢查；所以TSA建議旅客唔好將行李上鎖，方便檢查。嘩，唔鎖篋咪變咗無掩雞籠，鎖咗又會被TSA爆篋，咁點算呀！
老友叫我稍安毋躁，有旅行篋製造商近年推出「TSA鎖」嘅行李篋，即係話TSA會備有開啓該類旅行篋嘅鑰匙，可以自行開篋檢查而毋須損壞旅行篋。消委會早前測試咗巿面13款硬篋同軟篋，硬篋中有一款牌子叫EMINENT嘅8Q72923型號，同埋軟篋ELLEHomme嘅infinitiveCollection36129，都係用TSA鎖。總言之，如果去美國旅行，又唔想被爆篋，去皮具店買篋嗰陣問清楚係咪「TSA鎖」行李篋。有關TSA嘅最近資訊，都可以瀏覽網站： http://www.tsa.gov。
逢周一至周四刊出