韓星李東健前日捧住亡弟骨灰由澳洲返韓後，隨即到首爾江南區嘅三星醫療院設置嘅靈堂，接待親友到場拜祭胞弟。李東健嘅前女友韓智慧帶住沉重心情，約喺前晚11時半抵達靈堂弔唁，其間更感觸得眼淚直流。據韓智慧所屬經理人公司所講，當晚佢完成劇集《愛也好恨也好》後，就即刻趕往醫院弔唁，雖然佢同李東健已經分手，但一直對故人好似親細佬咁看待。