彤叔乖孫鄭志剛（Adrian）一向好講健康同環保，自從佢入咗新世界發展（017）幫阿爺阿爸手，亦乘機將環保發揚光大，上個周末，新世界同屯門青年協會合作搞社企，唔止捐62萬港銀，Adrian仲做埋社企主席，培訓失業青年就業，做嘅正係好環保嘅舊衫回收，Adrian話搞環保活動難唔到佢，因為喺哈佛讀書時已經偷師。
Adrian話讀大學時都有參加環保project，並唔係人哋話做乜就做乜，而係留意人哋成個概念同營運係點，仲話外國嘅社企一早已經有環保課題。
個社企活動係畀啲15至25歲青年參加，主要培訓佢哋經營舊衫回收同銷售嘅生意，又喺新世界旗下部份屋苑擺回收箱支持，表現突出嘅青年，Adrian話唔排除會請對方入新世界打工。
呢壇啱啱先開始，Adrian原來已着手籌備緊另一單，佢話新世界中國（917）今年9月會喺北京搞環保建築，即係用環保物料起樓，但只可以講住咁多，要賣吓關子，估唔到Adrian搞社企同環保叻啫，原來宣傳都一樣叻。