繼01年後，新西蘭再次揚威香港大球場。昨日舉行的香港國際七人欖球賽，「MeninBlack」新西蘭先後淘汰威爾斯、斐濟及南非等欖球勁旅，順利奪得最高榮譽的銀盃錦標。連奪世界巡迴賽首5站冠軍的新西蘭，連勝紀錄增至42場，MIB果然厲害。
記者：徐嘉華、李勇明、陳耀麟
攝影：王子俊、黃冠華、黎樹雄
國際七人欖球賽進入最後一天、亦即高潮所在的淘汰賽階段，4萬觀眾早已逼爆大球場。4屆冠軍英格蘭在早上的8強戰，以12:17不敵衞冕的薩摩亞，現場過半數的「紅玫瑰」支持者極為失望。英格蘭主將高寧斯（Gollings）賽後表示：「敗給薩摩亞不感到失望，畢竟球隊今年有多名新球員，他們經過今次鍛煉，對日後比賽將有大幫助。」
連勝42場總冠軍在望
自去年5月26日擊敗肯雅開始，新西蘭在七人欖球界所向披靡，來港前已累積36場連勝紀錄。而經過香港站賽事後，這支「黑衣兵團」連勝場數增至42場，並在今屆世界巡迴賽橫掃首5站冠軍（杜拜、南非、新西蘭、美國及香港），累積積分至110分，拋離第2位的南非有38分距離，巡迴賽只餘下3站，新西蘭奪全年總冠軍機會高唱入雲。
帶領球隊贏得10萬美元冠軍獎金的新西蘭隊長科比斯（DJForbes）賽後表示：「我為我的隊員感到自豪，他們努力了一年，造出不敗紀錄；不過，我們不會滿足現時成績，下站阿德萊德的比賽繼續努力。」
港隊挫日本注強心針
港隊方面，儘管球隊在銀碗準決賽被津巴布韋淘汰，但東道主能夠在8強擊敗日本，對稍後舉行的欖球世界盃外圍賽無疑是一支強心針。港隊副隊長卓銘然說：「我們並不怕中國和南韓，而今次贏了日本，對球員信心和球隊士氣都有幫助。這場勝仗，絕對能為世界盃外圍賽注入強心針。」
花絮：「艷女」男廁門口排隊
上個禮拜四有單新聞話有個男扮女裝嘅外國人，畀朋友喺公園五花大綁，而呢幾日亦有好多「艷女」喺大球場出現，仲有唔少人着住套衫喺男廁門口排隊（圖），小記睇完呢單新聞之後，真係有啲替佢哋擔心。
花絮：港隊基夫最受歡迎
論全日最受歡迎球員，莫過於香港隊嘅超新星基夫莫屬，雖然港隊喺銀碗4強大敗畀津巴布韋，但一班主場球員依然好識做，繞場一周簽晒名影晒相先走，其中基夫更加喺場邊留咗超過一個鐘，令到在場一班記者等佢做訪問等餐死。
花絮：南看台救護站踢晒腳
南看台不嬲都係玩得最癲嘅看台，所以負責嗰邊嘅救護站（圖）亦都忙到踢晒腳，飲醉酒仆親、畀酒瓶掟親，乜嘢事都有可能發生，睇嚟出年南看台除咗要多「實Q」之外，救護站都要多番啲至得。
花絮：長期受壓做掌上壓？
繼前日有人裸跑之後，噚日保安都明顯加強咗，警察及便衣探員都多咗好多，不過依然有球迷可以成功搞事；噚日有個外籍人士赤裸上身成功突圍，不過今次佢唔係裸跑，而係走去場中間做掌上壓（圖），可能佢平日長期受壓，到咗呢幾日要來個大解放。
