人到東京花似錦，上星期東京天氣甚佳，氣溫約十五度，陽光普照，滿地開花，真乃度假好時光。日本冇復活節假期，但在三月二十日星期四係「春分」（迎接春天來臨）假日，只放一天，好多人在星期五告假，於是有四日長假，相等於我哋放復活節假。三月二十四開始嘅一個星期，左丁山留在東京，覺得非常有味道，但係住多幾日，就知道「長安不易居」係乜嘢意思，惟有返香港搵錢。若係季子多金，喺東京過公子生活，可說享受無窮。
冇錢就冇咁好味道矣。公關大姐大喺復活節與成班朋友去咗東京玩得好高興，來電話介紹「北澤迴轉壽司」。於是去到新宿駅西口，行到Yodobashi電器舖後面就見到北澤酒店、北澤俱樂部，地下就係北澤迴轉壽司，門口仲貼咗一張香港《飲食男女》嘅推介。呢間壽司店宣傳：銀座材料、新宿價錢。一碟大拖羅（兩件）售七百日圓，特製超級肥美拖羅（一件）售一千四百七十日圓，比其他迴轉壽司店貴好多。拖羅就的確係正斗過正斗，但想起在福崗嘅迴轉壽司店，吃同樣質素嘅大拖羅只需五百一十五日圓，便宜得多。當然，與香港一級壽司店嘅拖羅價錢相比，「北澤」又係抵食嘅。
食兩件超級正斗肥拖羅需二千九百四十日圓，一定唔飽。不過夜晚由肥仔K帶去池袋駅西口對面麥當勞店之後面一間大廈五樓嘅「溫野菜」（火鍋店），兩小時內任食只需三千日圓，就可以食到唔識行。此店專在比較冇咁顯眼嘅地點開舖，晚上由六點開到十二點，六小時內分三個時段，兩小時內任叫任食，有牛肉豬肉雞肉蔬菜及日式寬條麵等等，以牛肉最正，如果帶埋兩個細路去，又鍾意食肉嘅話，擔保覺得超值，比食壽司便宜好多。呢度食牛肉係普通貨之中嘅上等貨，當然難與「瀨里奈」相比，但在瀨里奈食六件牛肉已經要過萬日圓，又點比較呀。最近日圓滙價狂升，港紙貶值，喺東京飲食，唔睇住啲銀紙唔得！