民協舊年區議會選舉失利後，主席馮檢基黯然辭職，由老虎仔廖成利頂上，噚日更選出新一屆中委同領導層，仲罕有地有新女登場：本身係中委委員嘅九龍城區議員莫嘉嫻會出任副主席，同黨內元老級人馬譚國僑齊齊輔助老虎仔打江山。
俾老虎仔形容為「馮檢基接班人」嘅莫嘉嫻現年35歲，大學畢業，曾經做過老虎仔助理，00年同04年兩次區選都兩戰兩勝，戰績唔錯，證明觀眾緣幾好。
備受力捧嘅莫嘉嫻強調會繼續主打婦女事務，今年9月仲會拍住馮檢基喺九西參選立法會，相信都係為接班做準備。
民協改選後，中委嘅平均年齡係42歲，比上屆嘅47歲低，證明黨內逐漸年輕化，希望新民協可以有多啲活力。