由富豪第二代成立嘅百仁基金，趁噚日星期日搞活動，邀請成100個天水圍低收入家庭嘅小朋友，入元朗參觀文物兼食盆菜，身兼百仁基金委員嘅李家誠仲帶埋老婆徐子淇嚟出席。成班小五至中六嘅細路梗係開心，但幾個小朋友傾偈時就話，唔識邊個係李家誠同徐子淇；睇嚟天水圍真係隔涉咗啲，需要多啲支援。
話說活動期間，班小朋友七嘴八舌咁喺度熱烈討論，其中一個年約11、12歲嘅小妹妹問朋友仔：「乜李家誠唔係頭髮白啲、少啲嘅咩？」好明顯，佢講緊嘅應該係香港首富李嘉誠；對於經常見報嘅李太徐子淇，佢亦似乎唔係好認得。不過，有細路仔認得李生，好醒目咁答個妹妹話：「佢係李兆基個仔吖嘛。」
雖然唔係個個識，但班小朋友仍然興高采烈咁用相機影阿李生、李太，有啲細路仲走埋去要求合照，李生、李太都欣然配合。李氏伉儷噚日以間條恤衫情侶裝拍拖參加活動，產後已經收身嘅徐子淇仲低胸上陣㖭。
又食又玩又拎
雖然冇帶個金叵羅囡囡晞彤出嚟，但徐子淇母愛爆棚，開口埋口都掛住個BB，話出門口之前剛剛餵完BB食糊仔，又話近期香港爆流感，個女都有些少感冒，見親佢流鼻涕就心痛，用紙巾抹又驚整損個鼻仔，惟有用棉花棒清理。徐子淇喺參觀屏山鄧族文物館時，仲話見到以前啲人用嘅嬰兒用品，覺得好有趣。
佢話，向來有同老公捐錢資助內地同印度嘅小朋友學習，每個月千幾二千蚊，啲小朋友好生性，有啲幾年後仲寫信畀佢哋，話已經可以自力更生，毋須再接受資助咁話。雖然做善事冇分多少，但千幾二千蚊對李生、李太嚟講，真係濕濕碎，咁有意義嘅嘢不妨做多啲。
百仁基金副主席施榮忻話，今次活動本來諗過請班小朋友去廸士尼，但覺得冇乜嘢學，地方分散又難照顧，所以改入元朗參觀文物館、文物徑兼食盆菜，可以順便學埋香港歷史。每個小朋友仲可以獲贈電子辭典同《圖解中國國情》圖書一本，真係有得食有得玩有嘢拎之餘，仲夠晒政治正確㖭。
mailto:[email protected]