如果話PSP最多人玩、最有影響力嘅遊戲，根據近日網上嘅群眾反應，就知首屈一指肯定係《MonsterHunterPortable2ndG》！皆因上集已搞到全城盡興，如今呢隻極級加強版更可用萬眾期待嚟形容。喺眾多魔物獵人當中，最出名應該包括ILoveUBoyz（艾粒）嘅Donald，喺《MHP2》嗰陣已經玩到金睛火眼，如今當然唔會例外，所以Capcom就將全港第一隻行貨親手送到商台畀佢。睇見Donald笑到見牙唔見眼，就知佢有幾咁Happy啦！
文：陳福榮
廠方人肉極速送貨
由於好多人都知Donald係標準機迷，仲極度愛上《MHP》系列，所以廠方舊年推出第二集都有搵艾粒做商場騷搞吓宣傳。到今集未見街仲畀佢優先擁有實Game，唔係傳媒即場試玩、冇得拎走咁簡單，證明佢真係勁有「飛屎」。
據Donald表示，儘管自己上集仲未打爆機，但都算花咗唔少鐘數落去。而佢絕對唔介意隻Game難玩，「因為越難打，戰勝對手先有無比滿足感，但如果玩起嚟太麻煩嘅話，都好快冇癮啦。」佢仲話今集點都會孖埋班903DJ如細蘇、Leo甚至關楚耀、張致恆等歌手怒煲，始終正Game又點可以唔同成班志同道合者分享。
瘋狂機迷爭住買
至於代理拎唔到「拉臣」嘅同捆主機版，早於周一晚上就殺到本港，但索價超過四千銀真係唔嘢小，碌盡友情卡都要三千幾，同單買標價平過三嚿嘅淨Game差幾條街！所以唔少人都好忍得手，一直等到星期三下晝行貨推出先出手，結果灣仔數字場喺極短時間內人頭湧湧，粗略估計高峯期單在一間Game舖，都排咗超過一百人！而且據知因日圓飆升，冇訂到嘅朋友要畀多幾草先落到樓，但正所謂千金難買心頭好，幾廿蚊又算得啲咩吖？
G級任務唔易食
問Donald之前玩成點，佢話平時只有趁食晏嘅空檔同其他同事組隊開局，或者收咗工返屋企瘋狂劈怪，令平時視力甚佳嘅佢，俾「芒亨」整到有啲近視喎！由於仲未完成上集一定數量嘅HR6任務，所以即使嚟到《MHP2G》都未能即時挑戰眠鳥或者迅龍呢啲全新敵人。但隻Game基本上係包含晒成隻《MHP2》在內，大家都係盡快搵朋友幫手，夾手夾腳打開通往最上級G級任務嘅大門。
孖住貓貓上戰場
咪以為《MHP》系列只識打打殺殺，其實內容某程度上都算好有心思。上集增設咗班貓貓幫你看門口同煮飯，慌死唔整啲變壞食物毒瓜你咁；到咗今集養育貓貓嘅玩法有更多變化，佢哋會喺單人離線模式陪你執行任務。起初都係搞亂檔居多，成事不足敗事有餘，但嗰啲專用武裝又真係好鬼得意；單睇呢點份上，畀心機幫班衰貓升吓Lv咯！
預先安裝快如閃電
《MHP2》引入咗BGLoading，喺進入版圖後預先讀定部份資料，務求縮短整體讀碟時間，但因為咁會幾食電吓，所以唔少人都帶齊火牛去Cafe操機。今次《MHP2G》再加埋類似邪道嘅MediaInstall，一炮過預先安裝580MB資料入去，以往Load到死嘅情況即時消失。亦因為咁好多機迷都響買Game嗰陣，順便買多張1GB或2GBMemoryStick，都算係間接推動消費意欲。
Profile
機種：PSP
廠商：Capcom
類型：ACT
人數：1-4人
日期：已推出
價格：$288
查詢：23661001
