超級星期天點可以冇我求驗客？同平時唔同，逢禮拜日我會少啲批判，同大家分享多啲得意新聞，等大家睇得過癮。
美籍韓裔高球靚女魏聖美，舊年宣佈暫時放棄打職業賽後，入咗史丹福大學讀書。仲以為美少女放棄豐厚收入一心向學，點知原來都係不甘寂寞，早前被同學影到同籃球隊中鋒魯賓盧比斯拍拖，不過外界就唔睇好喇！
早喺05年，當時只得16歲嘅魏聖美宣佈轉打職業賽，但成績一直未如理想，加上為咗學業，上年決定暫時擱置做職業球手。今年佢仲因傷只玩咗2月喺夏威夷嘅公開賽，一心專注學業。不過史丹福校友最近將美少女同魯賓喺學校慈善晚會拍拖嘅相（小圖），post咗上校內嘅是非網頁stanfordsecret.com，有知情人更踢爆美少女當時仲競投咗整隊男子排球隊陪佢，搞到魯賓呷晒醋。
男友只係校隊大後備
原來呢個身高7呎嘅魯賓來頭都唔小，佢喺美國大學籃球NCAA都薄有名氣，係史丹福校隊平均每場貢獻10分嘅中鋒。不過就唔夠佢嘅孖生大佬布洛克咁勁，布洛克每場攞成19分，仲壓過細佬搶咗正選個位。兄弟同心，佢兩個今季帶住史丹福大學，啱啱打入咗NCAA16強，唔好話唔威！
不過講到媾女，細佬就贏晒喇！魏聖美唔單止年輕貌美，而且仲身家豐厚，小妮子喺上年雖然一個冠軍都贏唔到，但係單憑贊助同廣告收入已經搵咗成1,900萬美金，即係成1.5億港幣！「高佬賓」認真識揀！但係外界已經批死佢兩個唔會長，因為話晒一個龍穿鳳，一個就褲穿窿；一個係高球壇人氣「1姐」，一個只係大後備，無論身價同身份都差太遠喇！
特稿：金童玉女一籮籮
以往網壇的金童玉女，首選是阿加斯和嘉芙，當今夢幻情侶莫過於悄悄「崛起」的舒拉寶娃，以及塞爾維亞的廸祖高域。這對緋聞情侶，因舒娃高調亮相美國公開賽為廸祖高域吶喊而傳得鬧哄哄，惟迄今兩人未曾承認，真亦假是假亦真。
不過體壇真心戀人卻多不勝數，如花樣滑冰世界冠軍組合申雪、趙宏博，兩人在07年結束了15年的冰上長跑，最經典肯定是07年世錦賽上，後者待樂曲奏畢隨即跪地與申雪擁抱並當眾求婚，上演了可能是冰壇史上最浪漫一幕。文：阿呢斯奧