入境事務處處長黎棟國早前突然宣佈退休，一如所料，由副處長白韞六接任做阿一。國務院噚日宣佈接受特首曾蔭權提名，任命白韞六做新處長，4月7號起坐正，黎Sir同日開始退休前休假。
白韞六於78年加入入境事務處做入境事務主任，由低做起終於摸頂，仕途算幾順利。不過佢投資物業眼光似乎麻麻，96年以378萬元買入何文田嘉輝臺單位，05年343萬元賣出，蝕35萬元；00年又以360萬入手將軍澳新都城一單位，06年甩手蝕17萬元；同年睇中大角嘴豪宅柏景灣，一擲668萬元買入，持貨至今賬面應該有賺，如果樓市繼續好景，白Sir隨時一鋪賺番晒。