李超人教散戶炒股基本功，其中一點係強調要PE不偏高。星俠思前想後，若套用李超人此一理據作為入市標準，其實目前散戶已可趁此「氣候冇去年咁好」之際，量力而為地殺入股海。點解？請問普羅股友，現時港股PE係幾多？
港股經過H股去年獲准「染藍」之後，市值逐步膨脹，成交金額持續企於近千億元水平，惟港股現時PE16倍都唔夠，參照過往經驗，港股PE炒至22倍左右才會響起警號，去年11月港股PE炒上24倍，結果真係見頂大調整。
故此，李超人指出PE不偏高係炒股入市原則，星俠覺得其實係「變相唱好」。事實冇得呃，港股PE的確唔算高，再加上李超人另一選股標準「有息派」，如果買一定有息派的盈富（2800）咪應晒呢套方程式？
有力升破50日線
市傳大陸將減股票印花稅救市之餘，又會嚴格規管上市公司再融資，內地證券股急升，明顯視作利好消息而炒上。若措施拍板落實，深滬股市或有一陣小陽春，應利好一些跌幅累計逾五成的大型中資保險股，其中投資內地股市比重最大的國壽（2628）應可受惠，該股昨收27.95元，已重上10日線，估計將乘勢升破50日線阻力29.8元，上試250日線33.8元。現價可吼，止蝕位暫放在20元。