薛凱琪（Fiona）昨日以代言人身份出席在銅鑼灣舉行的護膚品宣傳活動，由於早前她在慈善活動上遭圍觀者掟樽襲擊，今次活動也在鬧市進行，為免案件重演，大會安排了十多名保安維持秩序，Fiona在活動上與fans玩遊戲時，顯得步步為營，事後Fiona說：「我唔係怕佢哋，只係自己留意咗，今次嘅保安係大會安排，可能係覺得銅鑼灣人多，我事前冇要求，不過我都開心有咁多人幫助同保護。」
為祖名解畫
對於早前有報道指房祖名在台灣單挑四辣妹，Fiona護郎情切地說：「祖名係一個有風度同有禮貌嘅人，一班人男女一齊玩好平常！其實我對呢啲事都感同身受，可能大家都係易惹緋聞嘅人，同性出街又俾人話同性戀，其實藝人都要私生活，出去同朋友輕鬆吓都係好平常，我唔係偏幫佢，我只係以佢角度去講。」
採訪：何永寧
攝影：葉君海