新地郭氏家變風波暫息，被郭老太下令放假行開吓嘅大佬郭炳湘，聲言會返內地同去外國考察發掘新商機，八方唔知佢搵到幾多發達新靈感，但睇落佢似乎想真係放假去玩多啲。繼早前被八方同事直擊喺灣仔ClubJJ's夜蒲後，近日又再出動，由灣仔轉戰中環。
與太太同行
大K今次去中環新開嘅型格餐廳SEVVA見識吓。SEVVA係時裝女王JoyceMa妹妹郭志怡（Bonnie）最新搞作，位於太子大廈頂樓，最正係有個欣賞中環靚景嘅露台，中環人平時返工不見天日，SEVVA畀番中環一片天空佢哋唞氣。
Bonnie相識滿天下，日前開幕酒會好多城中名人捧場，大K畀面湊熱鬧，而且唔係單拖赴會，同正印Wendy雙雙到場。大K暫時唔使打理千億生意王國，個面口好似輕鬆咗好多，據當晚在場人士稱，唔多覺眼大K兩公婆糖黐豆咁玩恩愛，不過佢哋素來都好獨立，各自同自己朋友social好正常。大K位紅顏知己Ida係事業型女士，呢啲燈紅酒綠場合可能唔係幾啱feel。