法國第一夫人布魯妮（CarlaBruni）陪老公薩爾科齊（NicolasSarkozy）訪問英國，喺當地掀起一陣旋風，國際傳媒都大篇幅報道佢一舉一動，呢位聲色藝俱全嘅第一夫人搶晒鏡，風頭仲勁過佢老公。
八方睇新聞，見到早兩日布魯妮出席英女皇晚宴時，身穿藍色晚裝雍容華貴，原來佢佩戴嘅首飾都大有來頭。老友告知，當晚佢戴嗰套鉑金鑽石藍寶石耳環、項鏈係CHAUMET出品，總值逾1,000萬港元，手上隻Frisson白金鑽石腕錶亦價值連城。
據講呢套鉑金鑽石藍寶石耳環、項鏈，喺香港專門店都有同款show出嚟。CHAUMET成立於1780年，始創人Marie-EtienneNitot喺1802年獲拿破崙委任為加冕及大婚御用皇室珠寶匠，之後一直幫拿破崙同法國皇室成員設計珠寶，法國第一夫人幫手做模特兒不作他選。