有60年歷史嘅赤柱聖德蘭學校早排被教育局下旨面臨「殺校」，9月新學年唔可以再收小一新生。呢間學校可能唔係好出名，不過校友都幾有來頭，包括著名香港足球員山度士，「風之后」李麗珊奶奶、即係黃德森媽媽都係校友。
校方噚日舉行護校大會，有近400個校友、家長同街坊出席，佢哋發起簽名同喺手上綁上黃絲帶反對殺校，又商討救校方法，講講吓變成集體回憶大會，大談童年校園趣事。有家長喺會上話，囡囡喺名校讀得太辛苦搞到有情緒病，轉到聖德蘭就不藥而癒，係學校人情味醫好佢個女。其他家長、校友則話，赤柱得呢一間津校，殺埋就冇，負擔唔起私校或直資學校學費，就要去區外讀書，希望教育局收回成命，否則大家不惜上街護校。