港股連升4日，重上23000水平，大市轉穩，唔少股民再度伺機出擊。兩位嘉賓都認為大市回升可以趁機執平貨，並推介各自嘅心水股。
碩：黃敏碩 欣：李靄欣 玲：楊慧玲
玲：近期新股被市場忽略咗，大家炒大藍籌就夠，𠵱家通街平貨，好多人都想撈貨呢？兩位嘉賓有乜心水介紹。
碩：近期的而且確有啲股份好吸引，好似啲體育用品股安踏體育（2020）可以考慮，佢啱啱公佈業績，毛利有改善，除咗有自己品牌外，亦繼續增加代理品牌，股份估值同李寧（2331）相比，都有落後情況，值得留意。另一類係第二季可以做番好少少嘅內房股，呢類股份估值同舊年同期比較，已由溢價去番折讓，雖然大家可能對內房股未來走勢抱懷疑態度，因為怕宏調未完，但正如內地龍頭大哥萬科話割價賣樓情況有改善，加上整體內房股公佈業績都交到功課，同埋母公司背景比較強嘅內房股，其實股價對比資產淨值差不多折讓有四至五成，可以把握機會，作策略性追捧。
睇好內地零售股
欣：我就比較睇好中交建（1800），股價自從穿過15蚊之後，走勢靚番，佢喺中鐵建（1186）招股期間，都試過跌得好急，當時啲人將中鐵建、中鐵（390）同中交建嘅市盈率比較，甚至有基金經理由中交建換馬去中鐵建，不過𠵱家中交建嘅估值已經唔係最貴。如果中交建公佈嘅業績唔錯，股價有機會上望20蚊水平。
玲：內房股同內地零售股近期表現真係唔錯，但有投資者驚佢哋會回番落去喎！
碩：兩類股份都要選擇性投資，內房股方面，例如遠洋地產（3377），中國海外（688）、華潤置地（1109）、世茂房地產（813），呢啲股份屬於股東背景好同埋土地儲備多元化。
嘉賓推介股份一覽表
嘉賓：黃敏碩
安踏體育（2020）
昨收報：$8.03 變幅：+2.95% 市盈率（倍）：29.74
52周新高：$12.20 52周新低：$5.60
遠洋地產（3377）
昨收報：$7.66 變幅：+5.08% 市盈率（倍）：14.00
52周新高：$15.60 52周新低：$4.99
世茂（813）
昨收報：$13.76 變幅：+6.83% 市盈率（倍）：16.09
52周新高：$29.90 52周新低：$9.84
中國海外（688）
昨收報：$14.60 變幅：+2.24% 市盈率（倍）：25.66
52周新高：$21.00 52周新低：$9.45
華潤置地（1109）
昨收報：$13.40 變幅：+6.18% 市盈率（倍）：48.55
52周新高：$22.40 52周新低：$9.01
嘉賓：李靄欣
中交建（1800）
昨收報：$17.66 變幅：+5.37% 市盈率（倍）：60.48
52周新高：$25.40 52周新低：$9.25
旺旺低位有支持
郭小姐：今日2.9蚊入咗中國旺旺（151），佢比其他新股唔係跌好多，有浮番上水面迹象，加上佢出現咗一支陽燭，我覺得喺低位有支持，所以短線睇3.5蚊。
玲：旺旺招股價3蚊，上唔上到3.5蚊都係要睇大市氣氛。
碩：係呀，好多食品股之前都插水，不過今日雨潤食品（1068）、蒙牛乳業（2319）同康師傅（322）都有唔錯表現。雖然旺旺估值唔算貴，但係佢上唔上到3.5蚊就有保留，呢隻股長揸嘅條件一般。
郭：我都係諗住短炒，如果兩日到位我會落車。
欣：旺旺上番招股價3蚊都有可能，不過招股時中籤率高，3.3蚊應該有好重沽壓。其實𠵱家搵番啲大價股嚟買好啲，如果個市反彈，雖然話大藍籌、國企股蟹貨比較多，但好多有資金嘅投資者都會先買呢類股份。
--馬鞍山郭小姐個案--
買入價：2.9元 目標價：3.5元
止蝕價：2.5元 時期：一星期
中交建有機炒上
關公：想講吓隻中交建（1800），之前18蚊想入貨，最後冇入，你哋點睇呢隻基建股？
玲：中交建今日升超過5%，喺咪已經扭轉短期弱勢？
碩：我覺得中交建已經扭轉短期弱勢，三隻內地基建股以佢之前嘅回落幅度最驚人，曾經跌穿過15蚊，近期上番嚟。佢業務範疇多元化，唔似中鐵（390）同中鐵建（1186）咁要睇重鐵路基建業務。
欣：中交建喺4月8日公佈業績，有機會會炒一轉，中交建短期場外期權引伸波幅俾人炒高，唔排除有人睇好佢業績買定貨。
--大埔關公建議--
建議買入價：17.66元 目標價：19.5元
止蝕價：16.5元 時期：一個月