今次Volvo北極試車日子唔算長，但就樣樣事都係我嘅新鮮事。第一次去瑞典、第一次喺雪地揸車、第一次落Track甩尾、第一次撞車撼雪、第一次揸雪上電單車兼炒車……多到暈嘅第一次，為揸車生涯增添咗唔少可一不可再嘅難忘經歷，亦可能係一生中唯一一次北極自駕之旅㖭！
記者、攝影：梁美甜
鳴謝：VolvoCarsHK（29273388）
第一次凍僵
轉咗幾程機，終嚟到北歐瑞典首都Stockholm，但今次試車場地選址係更北面嘅Kiruna，於是要停一晚再轉乘內陸機。由於Kiruna位處北極圈66°33'以北，喺北極圈範圍入面，所以今次絕對係北極試車。據Volvo代理朋友指香港仲未有XC70，於是一到營地見到多部不同型號全新Volvo車款，就急不及待摷部XC70嚟玩喇！無講錯，真係「摷」，事關成排車已經俾雪蓋住！無法喇，溫度只有約攝氏零下22度，怕凍嘅我直頭凍到癲，入黑就更加唔使講！臨入暖笠笠嘅室內之前，望住部車，想到嘅係部車成晚留喺天然大冰櫃入面點保溫呢？開車前莫非要早幾個鐘撻定車？咁水箱水又點呢，唔怕結冰咩？
第一次撞車
今次試車，除各項實試嘅時候要揸車外，各測試地點都由自己揸車前往，因此整個旅程足有三分二時間可以揸住車喺雪地上行。雖曾到過唔少落雪嘅地方，但喺雪地上揸車就真係第一次，好唔慣！
揸住部XC70出發，映入眼嘅全都係一片雪白，分不清東南西北，只好緊跟前面部車，「拉住龍」前進。之不過天要玩我，避也避不了。突然間，一部大貨車從對面線逆向經過，隨即漫天飛雪，即時踩Brake放慢速度，都係要撞，唔係撞車而係撞雪，俾成幾呎厚棉花糖般嘅雪牆，食住唔郁得，雖然唔只我一人揸車撞到雪牆或食住部車，但食到郁唔到要出動到拖車嘅就得我一個，𤓓！
第一次狂甩
今次實試，自己主要選擇XC70同XC90嚟試，之不過大會亦安排咗唔同車款進行唔同測試，好似用S80作升級冰面滑行、C30R-Design作甩尾賽車、XC70同XC90就作On-offRoad及長途駕駛之用。無論喺咩測試，大家都狂甩，自己更加不在話下，狂甩之餘仲狂撼，賽車時一甩尾，C30仲撼埋雪中撼到砰砰聲㖭。最令人驚訝嘅無論係XC70抑或係C30都好，無因為多次又甩又撼而有揩花凹陷，可見車身鋼水唔錯之餘，連表面用嘅漆油加工表現優秀，防揩花損傷能力奇高，從而反映出一向強調安全性嘅Volvo，無論係車架以至全車防撞防護工夫都做到足，所謂信心咪就係咁嚟囉！
難啃鹿肉加冰
相信好多人喺嚴寒嘅天氣下，最想食嘅一定係熱食，我都唔例外，揸咗成朝車之後，午餐原是熱辣辣鹿肉配薯菜，剛好有事走開幾分鐘，回來滾燙嘅鹿肉已經變成「外冷內暖」。算數，飲水都得啫，一扭樽蓋，「沙」，蓋都未攞開，即見成樽水由樽口結冰至樽底，誇到變戲法咁！總之呢一餐，認真難啃！
