我有個心願，希望可以闖兩極、登七峯，最後都係因為懶同窮而老早打消呢個念頭。誰知今勻試車竟然有機會直闖北極，喺瑞典北面、攝氏零下11度至零下22度嘅極地Kiruna，一連幾日踩住Volvo嘅不同車種，喺冰封雪地上實試。狂甩狂撼狂放，車，依然完好矯捷，原來最「狂」嘅係試車嘅人！
記者、攝影：梁美甜
鳴謝：VolvoCarsHK
冰面考技術 揸到發狂
第一次喺茫茫雪地上駕駛，明顯雞手鴨腳，好彩Volvo代理安排咗導師指點。第一式：跣胎時執生。方法係踩盡個Brake，再配合扭軚，借住滑行個勢來令部車重新進入軌道。聽就簡單，做就困難，結果大家唔係踩Brake唔夠盡，就係踩位唔啱，又或者手腳唔配合，總之無人舞得掂！再試，大家已懶理做標記嘅雪糕筒，狂踩Brake，結果雪糕筒橫飛，我仲差啲俾個飛行雪糕筒撞中車頭玻璃，可想而知大家開始發狂！揸住XC90V8，300幾匹馬力嘅SUV，輕輕一腳，未聽到引擎運轉聲已經去到60km/h，前行唔夠百米，出盡力踩盡個Brake再左扭右扭個軚，跣住去到終點，停！遠處傳來一句：「Good！」High到爆唔係因為導師讚賞，而係狂踩嘅快感。
第二式難度升級，係利用S80進行BrakeTest！以70至80公里喺百米之內行駛，到標示點狂踩Brake再扭軚進入指定軌道。之後，百米內加速到100km/h再狂踩Brake急停，睇吓可以向前滑行幾多，以140米為至好。踩Brake鬥遠超級好玩，百米加速猶如飛機進入跑道，推背感強，急停一刻快感爆燈！
扭上雪山 車在跳舞
今次我揸嘅係無引入香港嘅XC70。同XC90一樣配有全天候四輪驅動系統，能因應唔同氣候同路面情況而自動調節，為咗試吓呢副聰明偈嘅On-offRoad性能，兩人一部車，齊齊踩住佢上山。路窄而斜，全都被雪所包圍，大部份路兩旁嘅積雪比車身還要高，加上太陽剛穿過厚雲，陽光融化唔少路面積雪，令行車更難。看到前面唔少車都喺度「跳舞」左扭右扭。無法喇，路窄到啱啱夠行一部車咋，地面仲要好跣，一個唔該隨時撞雪牆都幾好笑。之不過大大部嘅SUV操控易反應快而且馬力夠，只要揸嗰個反應夠快就絕對可以安全抵壘！車上仲裝有Sensor，當車身與周邊太貼嘅時候，就會體貼地提示你，可想而知成程車車廂有幾嘈。加上放眼前面幾部扭動嘅車，呢一刻，想放聲大笑，因為……場面真係好滑稽！
雪地賽車 勁甩尾
雪地鍊車！聽到都好激，可以喺賽道上競賽，兼狂甩尾都無有怕，事關賽道兩旁係幾呎厚、棉花般嘅雪，唔輕易揩花撼凹。加上大家相信Volvo喺雪地上嘅駕駛性能，最重要係呢個係計時賽，導師仲慌死大家行得慢，教埋點行，喺邊個彎行邊條線最快。於是乎，同時間多部C30就喺雪地中呼呼聲狂放狂飆！試圈時，我已經喺急彎度甩尾甩到車尾撼落雪堆，仲要有聲嗰隻！我就笑到咭咭聲，身邊Partner就唉唉聲。唓！你自己咪又係甩到High晒！
規格
XC90V8
引擎：4,414c.c.V8DOHC自然進氣
馬力：315hp/5,850rpm
扭力：440Nm/3,900rpm
傳動：六前速自動波
售價：$688,000
S803.2
引擎：3,192c.c.直六
馬力：238hp/6,200rpm
扭力：320Nm/3,200rpm
傳動：六前速自動波
售價：$529,000
C30R-Design
引擎：2,521c.c.直五T5
馬力：227hp/5,000rpm
扭力：32.7kgm/1,500-4,800rpm
傳動：五前速Geartronic
售價：待定