前晚花旗個市繼續跌，但係昨日港股冇乜理佢，期指結算日好友一於好少理，照推上去，恒指上晝升288點，以為差唔多，因為頂住大市計平均價結算嘅目的已達到，估唔到晏晝返嚟仲犀利，挾到班淡友唞唔到氣，埋單計數恒指升621點，報收23285，好近條50日線，破埋就可以試250日線。
六行三保輪要留意
個市4個交易日升咗2177點，但成交只係一般，呢啲升勢信唔信得過？大形勢未改變應該唔使懷疑，但係睇番昨日晏晝買盤掃得咁急，唔似淨係挾即市淡倉，上升股份好全面，特別要留意嘅係殘咗好耐嘅「六行三保」，油股亦唔理係高檔定低檔股，全部大炒，唔好忘記呢啲都係重磅嘅恒指成份股，如冇意外，下禮拜頭港股抽高嘅機會好大，唔可以排除上破250日線先至掉頭，100日線喺25731，如果大家昨日有入貨短炒，見到恒指真係逼向100日線，到時先考慮短線獲利。
咁長線又點？除非有大成交升破100日線，否則唔係長線買貨嘅時候，不過，就算係炒一轉短嘅，如果真係炒「六行三保」同國企股，應該有好多機會嘞，下禮拜頭要睇實乜嘢輪？如果呢兩日國內冇加息，就炒「六行三保」啲C輪啦。
思捷C輪5477：思捷（330）昨收95.65元，喺10日同20日線之間橫行咗3日，昨日終於向上突破，睇個勢，上試102元應該冇問題，破位可以睇108元，可以諗吓隻思捷C輪5477。隻輪昨收1.46元，槓桿率6.6倍（有效3.6倍），正股升上108元，5477應該喺2.20元樓上，正股跌穿89.30元沽出隻輪止蝕。