江若琳（Elanne）和阮民安（Tommy）前日傍晚在旺角鬧市派發新戲《嚇死你》的首映門票，同場還有工作人員扮鬼造勢，吸引大批市民爭相搶奪，場面混亂，幸好電影公司出動十多位保安，最終順利派完門票。問Elanne可否擔心被人博懵？她說：「公司都安排咗保安，原本形象指導叫我着短褲，不過我怕有意外，都係着番條牛仔褲。」
記者笑言Tommy未有幫手護花，他即喊寃說：「公司叫我要派晒啲飛，已經好多人保護佢，連啲鬼都保護佢，再加埋fans，唔使我啦！」由於首映在下月1日的愚人節舉行，不少市民擔心是假的，又詢問要不要錢，令他啼笑皆非。Elanne坦言自己在戲中作大犧牲，以素顏上陣，故新戲上映她會抽空到不同地區戲院視察觀眾反應。
採訪、攝影：藍文浩