自福崗返東京，唔坐火車咯，改乘全日空嘅空中穿梭，每小時一班機，十分方便。原來機票價格有兩種，搭固定時間班機，錯過咗就冇得賠嘅機票售兩萬零三百日圓，搭有得賠（即是錯過十二點可以改坐一點、兩點、三點班機）嘅靈活時間班機機票，要三萬五千三百日圓，貴足五成。大概只有一啲商社專員忙於開會、見客，唔肯定上機時間嘅，先至會買貴機票啫，我哋梗係買二萬日圓嗰隻機票啦。福崗機場離開市中心不遠，搭的士二十分鐘就到，邊會錯過上機時間㗎。
嘩，旅客真係多，可載三百幾人嘅波音機無一空位，如果班班機都咁滿，福崗─東京直情係黃金航線。航機時間只需九十分鐘，到咗羽田機場就坐Monorail入東京市區，再轉的士去新宿HyattRegency，點知司機話唔識係邊間，肥仔K立即改口話：「即係CenturyHyatt」，司機先至話：「係，係。」呢間酒店改咗名，要宣傳吓至得。
喺日本南部嘅福崗見唔到櫻花，令左丁山有啲失望，點知三月二十五日嘅東京，櫻花已經盛開，上野公園擠滿日本人與遊客，公園內之櫻花大道兩旁，畀日本人以早到早得嘅方法，各用藍色膠布鋪在地上，霸晒位，三五成群以至三、四十人坐在櫻花樹下賞花飲茶、飲酒，開心到極。左丁山參加肥仔K嘅碩士畢業禮後，當然從俗到上野公園一行，趁熱鬧，賞花之時碰到一對來自大陸嘅夫婦，同靚女同行，一望而知就係佢哋位千金啦，請位靚女同我哋揸機影番張相，我哋又同佢哋影番張全家福，閒談幾句，知道佢哋來自河南，左丁山順口講咗一句：「洛陽是河南名府，詩云，人到洛陽花似錦，今天我們在東京賞花，亦有此感覺。」點知大陸夫婦唔知左丁山講乜，只係回答一句：「我們來自鄭州」，唔通左丁山啲普通話水皮得好緊要？以後要勤加練習至得。行完上野公園，例牌去拜淺草觀音，跟住肥仔K話佢宿舍下面有條河，櫻花開得燦爛，於是立即去。宿舍在椿山莊四季酒店附近，小河兩岸果然被櫻花包圍，櫻花樹多到數唔晒，而且遊人稀疏，影相無人騷擾，認真爽！