在潮濕嘅春天，阿媽經常為屋企晾極都唔亁嘅濕衫苦惱不已，又濕又暖嘅春天好易令人病，最好食多啲可以提高免疫力嘅食物，用食療抵抗病菌侵襲，而都幾受香港人歡迎嘅韭菜，原來係提高抵抗力嘅極品蔬菜。
香味來自硫化物
韭菜獨特嘅香味原來係嚟自豐富嘅硫化物，唔單止可以殺菌，仲可以幫助身體吸收維他命A同B1，令抵抗力越嚟越好，𠵱家仲係流感高峯期，不妨試吓每餐加啲韭菜。
好多人都誤會咗只有食大葱先可以幫助身體抵抗病菌入侵，其實韭菜都有異曲同工之妙，因為韭菜嘅主要營養成分包括維他命B1、B2、C、胡蘿蔔素、碳水化合物、礦物質同纖維，每100克韭菜就有1.5克纖維，比大葱同芹菜仲要多，經常食可以促進大、小腸郁動，預防便秘同大腸癌，其他對健康嘅好處仲有阻止膽固醇吸收、預防動脈硬化同冠心病。
點樣煮韭菜先可以保留到最多嘅營養？由於硫化物遇熱易揮發，所以韭菜要用猛火快炒就起鍋，建議同豬肉一齊炒，就係一碟好美味嘅餸菜。韭菜係就係有益健康，但係千祈唔好食過量，因為太多纖維身體會消化唔到，隨時引起肚屙，最好每餐食100至200克，唔好多過400克，飲酒之後都唔應該食。
blog主：醫神