昨日中國A股出現絕地反擊，正如日前所說，QDII基金清盤新聞上電視，悲觀情緒都差不多了吧，A股跌市已到尾聲，呢次終極一跌，應已在本周四出現，短期至少有一次可觀的反彈浪。
噚日上海A股大升177點，基本上都係舊聞新炒，有政協代表兼大學教授於兩會前提出減股票印花稅，方法是只在賣出股票時徵收（現時則是買入和沽出都要雙邊徵費），目的是減低買賣成本，同時鼓勵投資者只買不沽，作長線投資。呢個消息，市場一早講到爛晒，到現在真係見底炒反彈，先至受到重視。
有通訊社引述某中小型證券行高層說，調整印花稅是遲早的事情，尤其改為單向徵收的可能性是存在的，只是如此這般的消息，便刺激第一上海（227）股價急升21%、申銀萬國（218）急升16%，而光大控股（165）亦升9.2%，本地證券股亦受有買盤跟進，英皇證券（717）升10%，大福證券（665）升7%。
其實從呢幾日香港上市之H股冇再跟A股係咁跌，醒目炒家已經嗅得出中資股初現炒味，而除咗日前提及之廣船（317），一啲頗跟A股表現之股份如濰柴動力（2338）等都離奇喪升，反映資金真係早人一步。
四日急升25%
另一隻離奇強勢的是中資金融股招商銀行（3968），過去一個星期4個交易日已急升近5.5元或25%，跑贏一眾中資金融股。招行在上一輪中資股升浪中單騎領放，升幅出眾，今次都係帶頭跑亦好合理，至於持有佢股權的招商中國基金（133），近4日亦錄得兩成多升幅，其手上投資組合除招行外還包括若干中資金融股及其他非上市證券投資，惟缺點是牌路較疏，都係招行較正路及好炒。