民協喺舊年區議會選舉慘敗，議席由原來25席減到17席，由89年起做民協主席嘅馮檢基辭職以示負責，民協今日會選出新一任主席，長達19年嘅馮檢基時代正式結束。
基哥退下，由情同兄弟嘅「老虎仔」廖成利做署理主席，由於冇人同佢競爭，相信老虎仔今日會順利接棒，民協終於完成第二次「世代輪替」。基哥噚日話，截至噚日都未聽過有人要同老虎仔爭做主席，估計佢順利當選機會極大。佢又話老虎仔性格硬朗，「我處事比較柔性，佢就比較硬。」舉例講佢自己俾人罵不還口，廖成利就會反駁。民協創立時由陳立橋領導，冇耐基哥上位，一做十幾年，若非選戰大敗，應該仲有排做。