行政會議召集人梁振英從政幾廿年，講過N次第N屆都唔會參選特首，噚日口風卻似乎有啲轉變，出席一個有關教育新書發佈會活動時，第N+1次被問到會唔會考慮參選特首，振英哥今次唔係答例牌答案，而係話自己多年來為社會做事，當年話唔選特首，係因為97年前大家嘅時間同注意力都集中喺回歸工作上，老董又眾望所歸，但現時香港仍然有好多長遠問題要處理，好似經濟結構同教育問題等，所以一切都要睇到時嘅情況，再考慮參唔參選。
振英哥又話，𠵱家討論參選問題言之尚早，暫時亦唔會做任何部署，總之每日都會做好自己嘅工作。佢咁講真係惹人遐想，佢近期一改低調作風，先設立個人網誌軟銷形象，早前又接受訪問話，如果社會有需要而自己又有能力嘅話，會考慮選特首。
噚日振英哥大談兒時讀書辛酸，話完當年先發炮，指香港教育制度喺資源分配、師資同教學語言政策都有問題，希望可以行會召集人嘅力量向政府反映意見。要改革教育制度唔使咁間接喎，做特首咪由你話事囉！